OTON, ILOILO – Ginahulat na lang sang Women and Children Protection Desks sang Oton Municipal Police Station ang medical certificate sang 17 anyos nga dalagita matapos nga gina-alegar ginhimuslan sang duha ka mga lalaki nga bag-o lang niya nakilala sa social media.
Ang babaye amo alyas Baby sang Iloilo City Proper samtang naga edad sa 18 anyos kag 19 anyos ang duha ka mga lalaki nga ginapahayag naghimulos sa iya.
Sa interview sang Bombo Radyo kay Pol. Staff Sergeant Ma. Elena Doliguez, pinuno sang Women and Children Protection Desks sa Oton, iya ginpahayag nga ginhagad sang duha ka mga lalaki si alyas Baby nga magpamista sa Barangay Pakiad, Oton apang wala man ini madayon.
Nagpadulong na lamang sila nga tatlo sa Barangay Trapiche kag nag inom-inom.
Gilayon nakabatyag sang pagkalingin sang ulo ang biktima kag natulugan.
Suno kay Doliguez, nakabugtaw lamang si alyas Baby sang nagasakay na ini sa tricycle kaupod ang mga suspek sa bahin sang Mandurriao papauli na kuntani sa Iloilo City Proper.
Ang ulihe nga madumduman sang biktima amo nga daw kaangay nga may naggapos sa iya kag nakabatyag man ini sang mabug-at sa iya lawas.
Natigayon naman nga mahibaluan sang iloy ni Alyas Baby ang natabo bangud nakita sini ang text message sang isa sang mga suspek nga nagapamangkot sa biktima kun bala manamit man ini.
