Kritikal ang kondisyon sang 17-anyos nga solterito matapos natiruhan samtang nagapanyapon kaupod ang iya nga amay sa sulod sang ila nga payag sa Barangay Bulabog, Bingawan, Iloilo.
Naigu sang bala ang biktima sa tuo nga bahin sang tiyan.
Sa interview sang Bombo Radyo kay Police Lt. Ryan Christ Inot, hepe sang Bingawan Municipal Police Station, iya ginpahayag nga naglusot lang ang bala sa dingding kag nakibot na lang ang amay nga napilasan na ang iya nga anak. 12 gauge shotgun ang gingamit suno sa hepe.
Wala nakit-an kun sin-o ang may kahimuan bangud wala sang kuryente sa amo nga lugar kag mamunog pa ang ulan kagab-i.
Ang mag-amay ang tumandok gid sang banwa sang Calinog, Iloilo apang naga-tinir na sa amo nga lugar bangud nagabantay sila sang manukan.
Apisar wala nakit-an kun sin-o ang suspek, may ginadudahan ang amay kun sin-o ang responsable sa krimen.
Sandig sa panaysayon sini sa pulis, posible nga siya gid ang tuyo sang suspek bangud antes natabo ang insidente, may yara siya sang nakabais.
Ginapahayag nga may negosyante nga luyag magbakal sang manok, apang wala nagpasugot ang amay.
Suno sa amay, ang amo lang nga negosyante ang nagaisahanon niya nga nakaaway, kag amo man ang nagaisahanon nga ginaalegar nagadumot sa iya.
Indi magpasaka sang panumbungon ang amay bangud indi siya sigurado bangud wala man sang iban nga nakakita sang natabo.
