ILOILO CITY – Posible magapangatubang sa kaso nga paglapas sa Anti-Hazing Law ang mga miyembro sang Triskelion Fraternity nga nadakpan nga nagapatigayon sang hazing sa Barangay Fernando Parcon Ward, Pototan, Iloilo.
Sa exclusive interview sang Bombo Radyo kay PO3 Mark Parreno, imbestigador sang Pototan Municipal Police Station, ginpahayag sini nga 17 ka mga miyembro sang fraternity ang naangot sa hazing, lima sa mga ini ang ginapahayag nga gin-paddle.
Nag-angkon sang hematoma sa paa ang ginapahayag mga neophyte ukon bag-o nga mga miyembro sang grupo nga sanday Jonie De Guzman, 18; Rizaldy Pagulong, 22; Eduardo Abido Jr., 26; Edimar Precia, 18; kag Kyle Lester Papellero, 22.
Ginkilala ang master initiator sang grupo nga si Ian Jasper Jamotillo, 21, samtang ang Grand Treskillion naman mo si Christian Cordero, 23.
Nakuha naman sa ginluntaran sang hazing ang tatlo ka paddle nga may tatak sang logo sang Trisikelion Fraternity.