17 pilason sa pagbaliskad sang jeep sa Guimaras matapos magpalumbaanay

ILOILO CITY – Pilason ang 17 ka mga pasahero matapos magbaliskad ang isa ka jeep sa Barangay Alaguisoc, Jordan, Guimaras.
Sa interview sang Bombo Radyo, ginpahayag ni S/Insp. Edwin Belarmino, hepe sang Jordan Municipal Police Station, nga nagpalumbaanay ang duha ka jeep gikan sa Jordan Wharf padulong sa San Miguel, Jordan.
Suno kay Belarmino, sakay sang John Lawrence nga jeep ang 24 ka mga pasahero kun sa diin kadamuan sang mga ini ang manunudlo nga mapauli na kuntani gikan sa seminar sa siyudad sang Iloilo.
Gintuyo sang driver nga si Danny Sabid nga mag-overtake sa J Brothers nga jeep nga ginamaneho ni Dominador Diamante kag may karga nga 18 ka mga pasahero.
Apang nadulaan sang kontrol si Sabid sa Manibela rason nga natumba ang jeep kag nagbaliskad samtang nahulog naman sa gutter ang jeep nga ginamaneho ni Diamante.
Sa karon yara na sa kustodiya sang Jaro Municipal Police Station ang duha ka mga drivers.