17 pilason sa pagkahulog sang bus sa kanal sa Iloilo

ILOILO CITY – Pilason ang 17 ka mga pasahero sang bus nga nahulog sa kanal sa Barangay Tinocuan, Dingle, Iloilo.
Sa interview sang Bombo Radyo Iloilo, ginpahayag ni PO2 Christopher Persia, imbestigador sang Dingle Municipal Police Station, nga nagikan sa siyudad sang Iloilo ang Jamindan Bus kag padulong kuntani sa banwa sang Jamindan sa Capiz.
Sa pagpangusisa sang kapulisan, nagpreno ang driver sang bus nga si Joel Barredo, 51, sang Mambusao, Capiz apang wala magkagat ang preno.
Sa ika-duha sini nga tuyo magpreno, may nabatian ini nga daw naglupok rason nga ginhungod na lang ihulog sa kanal ang bus sa baylo nga magbunggo ini sa ginasundan nga truck.
Kabug-usan nga 22 ka tawo ang pasahero sang bus sang matabo ang insidente.
Padayon nga ginabulong ang mga biktima sa Pototan District Hospital kalakip na ang driver sang bus.