Nakapauli nqa sa Pilipinas ang 176 ka mga Pilipino nga ginpasalig nga maka-obra sa Thailand apang natuntuhan gali kag sa baylo, gin-traffick, gin-scam, kag gin-torture pa sa Myanmar.
May ginpatigayon ang gobyerno nga chartered flight sakay ang Philippine officials kag nagkadto sa Thailand agud sugaton ang na-rescue nga mga biktima nga halin sa scam hubs sa amo nga pungsod.
Bangud nga gin-smuggle lamang sila, ang ila katapusan nga passport stamp ang halin pa sa Thailand gani nga nagguwa nga nangin overstaying visitors pa sila, apang nagpasugot man ang Thai authorities nga makabiya sila gilayon paagi sa chartered flight pabalik sa Manila.
Base sa istorya sang isa ka Pinay, siya kag ang iya bana ang na-rescruit paagi lamang sa messaging app kag ginpasalig nga maga-obra sila bilang call center agents sa Thailand. Ginhugpa sila una sa Hong Kong, gindala sa Bangkok, apang wala sila didto nagtinir bangud ginkarga sila sa sakayang pandagat kag gindala sa Myanmar.
Didto suno sa natungdan gin-torture sila kag wala ginpakaon sa halos isa ka semana bisan pa nga nagabusong ang Pinay. Makapila ka beses man sila nga ginbaligya sang ila Chinese employer kag ginsunog pa ang passport sang bana.
Ginpaathag naman ni Department of Foreign Affairs (DFA) Undersecretary Eduardo De Vega nga nakapauli lamang sila sa Pilipinas bangud nagsira na ang scam factories.
Ginpatigayon man ang pagpauli paagi sa trilateral cooperation sang Myanmar, Thailand, kag Pilipinas.
Apang ginbuyagyag man ni De Vega nga madamo pa nga Pinoy ang na-trap gihapon sa scam hubs sa Myanmar, Cambodia, kag Laos, kag kadam-an sa ila ang gina-traffick halin sa Thailand.
Sa ila pagbalik sa Pilipinas, nagpirma ang mga biktima sang sworn statements para makabulig nga mapasaka ang kaso batok sa recruiters. Ginhatagan man sila sang kuwarta kag iban pa nga assistance halin sa gobyerno.
“Each victim also received Php 50,000 in financial assistance from the DMW’s AKSYON Fund and Php 10,000 from OWWA, aside from the immediate medical and psychosocial services from the Department of Health (DoH) and Department of Social Welfare and Development (DSWD). The DMW will also provide legal assistance to the victims in addition to the reintegration support and upskilling trainings through the Technical Education and Skills Development Authority (TESDA),” suno sa press statement sang DMW.#
