ILOILO CITY – Patigayunon na sa Marso 1 tubtob Marso 3, 2020 ang 17th Provincial Barangay Congress sa SMX Convention Center sa Pasay, City.
Sa interview sang Bombo Radyo kay Liga ng mga Barangay President kag ex-officio member Dorothy Paes, iya ginpahayag nga ang National Liga ng mga Barangay ang host apang ang probinsya sang Iloilo lamang ang partisipante sa nasambit nga kahiwatan.
Suno kay Paes, may yara sang P19,800 nga registration fee sa kada Punong Barangay, Sangguniang Barangay Member, SK Chairman kag iban pa nga opisyales sang baranagay nga magatambong sa Congress.
Ang plete naman sa barko ukon eroplano padulong sa Metro Manila ang wala nalakip sa P19,800.
Pahayag niya, ang registration fee kag plete sa barko ukon eroplano ang kuhaon sa pondo sang Barangay.
Pahayag niya, may mga Galing Pook Awardee nga yara sa bahin sang Manila kag madamo sang speaker nga magahatag sang ideya sa nagkalain-lain nga topiko nahanungod sa pagpasangkad pa sang mga barangay sa probinsya.
May yara na sang 600 ka mga Barangay Officials nga nakapa rehistro sa probinsya sang Iloilo kag ang iban suno sa iya ang indi man magtambong bangud sa ila nga mga edad kag ang iban nga pondo sa barangay ang wala pa naaprubahan sa Sangguniang Bayan.
