ILOILO CITY – 18 ka mga maanyag kag maalam nga Ilongga beauty queen ang maga-agaway sa tatlo ka korona sa grand coronation night sang Miss Iloilo Tourism 2019.
Sa interview sang Bombo Radyo kay Dr. Jose Patubo, Tourism Officer sang San Enrique, Iloilo, iya ginpahayag nga ang coronation night sang Miss Iloilo Tourism 2019 ang patigayunon sa Setyembre 23 sa isa ka mall sa Mandurriao, Iloilo City.
Suno kay Dr. Patubo, may yara sang ticket sa coronation night apang mangin libre naman ang talent kag advocacy campaign competition nga patigayunon sa Setyembre 18.
Sa patigayunon nga coronation night, lima ang makakuha sang award nga ginalakipan sang Miss Iloilo Tourism, Miss Iloilo Eco Tourism, Miss Iloilo Heritage kag duha ka runners-up.
Ang mga makakuha sang korona ang magaserbe nga Tourism Ambassadress sang Iloilo.
Ang tagsa ka mga beauty queen nga nagpasakop sa nasambit nga pageant ang naghalin sa nagkalain-lain nga banwa sa probinsya sang Iloilo nga may yara sang tagsa ka tourism advocacy.
