ALIMODIAN, ILOILO — Nakaagom sang mga pilas ang 18 ka mga indibidwal nga sakay sang pribado nga jeep matapos nagbaliskad ini sa dalan sang Barangay Pajo, Alimodian, Iloilo.
Ang driver sang jeep amo si Razel Leo Salcedo, 42- anyos, kag residente sang nasambit man nga barangay.
Sa interview sang Bombo Radyo kay Police Master Sergeant Marlon Ladera, imbestigador sang Alimodian Municipal Police Station, iya ginpahayag nga pabalik na kuntani ang jeep sa nasambit nga barangay matapos nagkumpanyar ini sa isa ka lubong.
Suno kay Ladera, nanutisyar sang driver nga indi na sini makontrol ang preno sang padulhog na sila sa nasambit nga dalan, rason man nga ginwahig niya nalang ini pa-wala nga porsyon.
Ginpahayag man ni Ladera nga nagbaliskad gid ang jeep, sa diin 18 sa masobra 30 ka mga nakasakay diri ang nakaagom sang minor injury.
Nahibaluan nga sa subong, kalabanan sa mga pasahero ang out patient na, apang may isa ka menor-de-edad ang gin-refer sa ospital sa Iloilo City bangud sa ginareklamo sini nga pagpalanakit sang hawak.
Nakahunong naman subong sa Alimodian Municipal Police Station ang driver kag posible magapangatubang sang kaso nga reckless imprudence resulting to physical injury kun may magtuyo nga mapasaka sang kaso batok sa iya.
