Ginapahayag nga nagapanago subong ang 18 ka ka mga tawo nga nagpakilala nga anay Marines nga nagserbe bilang mga bagman ni anay former Ako Bicol Partylist Representative Elizaldy Co.
Suno sa grupo nga nagasuporta sa ila nga United People’s Initiative (UPI) nga ginabug-usan sang mga anay opisyal kag personnel sang military, nagapanago ang amo nga mga indibidwal bangud sa ila seguridad.
Suno sa secretary-general sang grupo nga si Rey Valeros Jr., may pamahog nga nakalab-ot sa 18 ka indibidwal pagkatapos sang ila pagpahayag nahanungod sa ginahingadlan nga pagdul-ong sang mga maleta nga puno sang kwarta sa pila ka opisyal sang gobyerno.
Nahibaluan nga wala magtambong ang amo nga mga indibidwal sa awarding ceremony sang United People’s Initiative (UPI) sa San Juan City kahapon, Marso 6.
Suno pa kay Valeros nga apisar nagapanago sila subong, ginpahayag sini nga handa ang amo nga ginaalegar former marines nga atubangon ang bisan ano nga imbestigasyon kun maga-lab-ot man ini sa Senado, Kamara, ukon sa Office of the Ombudsman.
Nahibaluan nga may ginpasaka na nga kaso-kriminal batok sa amo nga mga indibidwal lakip na kanday Atty. Levito Baligod kag former congressman Mike Defensor matapos ang pag-implicate nila sa pila ka government officials.
