Nagdangat sa 18 ka mga tawo ang gindakop sang mga pulis kahapon sang hapon, Agusto 26, bangud sa pagbarikada sang mga miyembro sang Kingdom of Jesus Christ (KOJC) sa dalan sa guwa sang compound sa Buhangin District sa Davao City kun sa diin nagapadayon ang operasyon sang Philippine National Police (PNP).
Antes ang alas tres, naghatag ang pulis sang dies minutos sa supporters ni Pastor Apollo Quiboloy agud nga tapuson na ang ila protesta bangud indi na makalabay ang mga motorista.
Wala gintuman sang protesters ang mandu sang pulis kag ginpasundan pa ini sang otoridad sang tatlo ka warnings para nga maghalin na ang grupo.
Nangin bayolente na ang sunod nga hitabo sang nagpahanghaboy na ang KOJC members sang mga bangko.
4:00 sa hapon naman sang ginpang-aresto na ang malapit 20 ka mga indibidwal kag natalana nga pasakaan sang kaso nga obstruction of justice.
Sa separado nga report sang otoridad, ginpahayag man nga halin sang ginsuguran ang police operations sang Sabado sang kaagahon, pito na ka mga pulis ang nasamaran.
Suno kay PNP spokesperson Col. Jean Fajardo, anum sa ila personnel ang ginpangdala gid sa Camp Quintin M. Merecido Hospital para sa medical treatment samtang isa naman ang ginbulong mismo sa compound.
Ginpatpat ni Fajardo nga nabuklan ang ulo sang isa ka pulis, may nahalitan nga nose bridge, kag kadam-an ang napilasan sa kamot kag tiil.
Ginsiling sini nga nangin agresibo ang mga myembro sang KOJC kun sa diin nagapanghaboy ang mga ini sang monobloc chairs, kag may videos man nga ginpaguwa ang Police Regional Office XI kun sa diin nakit-an nga may nagapanghaboy sang daku nga bato kag nagapangbasya sang mapangsot kag mabaho nga tubig.
“May putok na ulo na pulis natin, may basag ang nose bridge, maraming galos, maraming sugat sa paa at sa kamay. In fact, kung mapapansin ninyo hindi nanghuli ang ating kapulisan kahapon we want to deescalate yung (the) tense situation kahapon kahit pa binato tayo ng mga monobloc chairs at yung claim nila na meron tayong tear gas na ginamit ay wala katotohanan yun,” pahayag sini.
Sa press briefing, ginklaro sang natungdan nga indi mga pulis ang naga-umpisa sang ginamo baliskad sa alegasyon sang supporters ni Quiboloy nga naggamit ang otoridad sang tear gas.
Ginbulgar man sang natungdan nga may video sila kun sa diin nakit-an gid nga ang mga miyembro mismo sang KOJC nga nagasakit sa ila kaugalingon para mapaguwa nga ginkastigo sila ukon ginsamaran sang mga pulis.
“We are just waiting na ma-authenticate itong video na ito to show how desperate these people are para ipakita na umaabuso ‘yung mga pulis natin, nanakit ng mga pulis natin but on the contrary, ‘yung mga pulis natin ang minumura, tinatadyakan at sinasaktan at lahat ng klase ng pagmumura ay natanggap nung ating mga kapulisan,” pahayag ni Fajardo.
Sa tunga sini nga tensyon, ginpahayag sang Davao police nga padayunon nila ang pag-operate sa sulod sang 30-hectare compound bangud mas kumpyansa sila subong nga yara gid si Quiboloy sa sulod sini. ##
