Naaresto ang 183 drug personalities kag nakakumpiskar naman sang masobra pito ka kilo nga ginapasuni shabu nga nagabalor sang masobra P49 Million pesos ang Police Regional Office 6 sa bug-os nga Western Visayas.
Kasunod ini sang mga ginpatigayon nga anti-illegal drug operations sa sulod lamang sa kabug-usan nga bulan sang Hulyo.
Suno sa PRO6, 63 sa mga gin-aresto ang mga High-Value Individuals, samtang 120 naman ang mga Street-Level Individuals.
Nagpanguna sa pinakadako nga drug haul ang Iloilo Police Provincial Office (IPPO) matapos sini nga nadakpan ang 57 ka mga drug personalities kag nakarekober sang lapaw pa sa 2,700 grams nga suspected shabu.
Ginsundan man ini sang Iloilo City Police Office (ICPO) nga nakarekober naman sang masobra 2,200 grams nga ginapatihan shabu sa 82 ka mga drug suspects.
Ginpakigbahin man sang ahensya nga nangin madinalag-on ang nasambit nga mga operasyon bangud sa mas ginpasangkad nga intelligence gathering, surveillance, target validation, case build-up, kag sa koordinasyon man sang mga partner agencies kag sang publiko.
