ILOILO CITY – Padayon pa nga ginapangita sang Anilao Municipal Police Station ang 19-anyos nga suspek nga naghimulos sa 68-anyos nga tigulang sa isa ka barangay sa banwa sang Anilao, Iloilo.
Ang pagpanghimulos ang natabo ginabanta las-10:30 sa gab-i sang Sabado, Marso 26.
Sa interview sang Bombo Radyo kay Pol. Lt. Jersey Besas, hepe sang Anilao MPS, iya ginpahayag nga lunsay nag-inom sa isa ka okasyon ang duha kag nagpadul-ong ang biktima sa suspek bangud lapitanay man lang ang ila nga puluy-an.
Sang nakaabot na sila sa kawayanan kag madulom nga bahin, ginbutong sang 19-anyos ang 68-anyos kag didto na nga ginhimuslan.
Sang natapos na ang pagpanghimulos, gilayon nga nagpalagyo ang suspek sa wala nahibaluan nga direksyon.
Dugang pa ni Besas, bangud sang ginhimo sang suspek, gindugo ang pribado nga bahin sang lawas sang lola.
Padayon pa subong nga naka-confine sa ospital ang biktima.
Pahayag dugang ni Besas, wala pa nagagwa sa ila imbestigasyon nga nagapangaluyag na nga daan ang 19-anyos nga suspek sa 68-anyos nga biktima.
Una nga ginpahayag nga 26 ang edad sang suspek apang sa ginpatigayon nga follow up investigation, nahibaluan nga 19 pa gid lamang ang iya edad kag isa ka senior high school student.
Sa karon, may impormasyon na ang kapulisan kun sa diin na ang suspek.
Samtang, sa interview naman sang Bombo Radyo kay Police Executive Master Sergeant Rubie Hubo, chief sang Women and Children Protection Desk sang Anilao Police Station, iya ginpahayag nga posible nahimo sang 19-anyos nga suspek ang pagpanghimulos bangud sang tuman nga kahulugbon.
Ang biktima kag ang suspek ang madugay naman nga magkasilingan kag naga-inom gid lamang sa tion nga may okasyon.
Basi sa imbestigasyon sang kapulisan, wala sang criminal record ang 19-anyos nga suspek.
Ang biktima ang isa na ka balo, tatlo ang kabataan kag may kaapuhan.
Desidido naman ang pamilya sang biktima nga magpasaka sang kaso nga rape batuk sa suspek.
