ILOILO CITY – Nag-apply para sa sentineling program ang 19 ka mga barangay sa probinsya sang Iloilo.
Ang sentineling program amo ang magatumod sa kahandaan sang isa ka lugar agud nga makadiretso ini sa recovery kag repopulation matapos nga ma-infect sang African Swine Fever.
Sa interview sang Bombo Radyo kay Dr. Darel Tabuada, Iloilo Provincial Veterinarian, iya ginpahayag nga ang 19 ka mga barangay ang ipaidalom pa sa validation sang Provincial Veterinary Office.
Ang mga barangay ang ginalakipan sang Central, Progreso, Culasi, Silagon, Pedada, Pili, Poblacion, San Antonio, Barrido, Pinantan Diel, Santo Rosario, Malayuan, Puente Bunglas, Tanduyan, Luca, Pinay kag Espinosa sa Ajuy samtang Barangay San Sebastian, Nasugban kag Cadagmayan Norte naman sa Sta. Barbara.
Suno kay Tabuada, tanan nga 27 ka mga banwa nga apektado sang African Swine Fever ang gina-abisohan nga i-validate ang ila mga barangay nga posible ma-qualify para sa sentineling program.
Mahimo nga maka-apply ang barangay sa nasambit nga programa kun wala nakarekord sang African Swine Fever outbreak sa lugar makaligad ang 40 ka adlaw.
Lakip man sa parameters amo ang mga masunod:
*dapat wala sang nabilin nga baboy sa barangay;
*kun may nabilin nga baboy, gina-engganyo ang mga hog raisers nga ilakip ang mga ini sa sentinelling program;
*kag dapat nga in place sa gihapon ang biosecurity measures
Sa sulod sang 40 ka adlaw, regular nga i-monitor sang Provincial Veterinary Office, Department of Agriculture kag Municipal Agriculture Office ang sentinel piglet pinaagi sa pagkolekta sang blood samples agud nga i-test ini agud mahibaluan kun may yara sang infection.
Sa tion nga magguwa ang resulta sang test nga indi man infected ang baboy, hatagan ang farmer sang dugang nga duha ka mga sentinel piglets.
Pahayag sang natungdan, ang mga qualified farmers kag barangay ang iga-endorso sa Department of Agriculture sa masunod nga bulan bangud ang national government amo ang magapatuman sang sentineling program.
