Ginkumpirma sang Department of Migrant Workers (DMW) nga magaabot sa Pilipinas ang malapit 200 ka mga Pinoy halin sa Lebanon umpisa subong nga semana tubtub sa Oktubre 28.
Suno kay Migrant Workers Secretary Hans Leo Cacdac, 11 sa sini nga mga Pilipino ang magapauli sa Manila sa weekend.
Ginaproseso man subong sang gobyerno sang Pilipinas kag Lebanon ang mga dokumento sang 413 ka mga Pinoy nga nag-request man sang repatriation.
Pahayag sini, 179 subong ka mga Pilipino ang yara sa shelters sa palibot sang Beirut, indi pa ini puno, kag pwede pa maka-akomodar sang dugang nga occupants.
Ginpasalig man ni Cacdac sa magapauli nga overseas Filipino workers (OFWs) nga may assistance nga ihatag ang gobyerno sa ila kun makaabot na sila sa pungsod.
Ginalauman nga lakip diri ang financial assistance nga tubtub P150,000 halin sa DMW kag sa Overseas Workers Welfare Administration (OWWA). Magluwas diri, may ayuda-pinansyal man nga ihatag ang Department of Social Welfare and Development (DSWD) samtang ang Department of Health (DOH) ang magahatag naman sang medical assistance lakip na ang psychosocial support.
Nahibaluan nga halin sang nagsingki ang away sa Middle East, ang Philippine embassy sa Beirut ang nakabaton na sang 1,721 applications para sa repatriation as of Oct. 8 apang sa sini nga numero, 511 pa lamang ang napabalik sa Pilipinas.
