ILOILO CITY–Ginpanginwala ni Iloilo 1st district Cong. Richard Garin ang mga nagalapta nga impormasyon nga iya ipapatay si PO3 Federico Macaya Jr.
Ini matapos ang natabo nga pagsakit kag pagdupla ni Cong. Garin kay PO3 Macaya samtang ginatayaan naman ini sang armas sang iya amay nga si  Guimbal Mayor Oscar Garin.
Sa interview sang Bombo Radyo kay Iloilo Police Provincial Office (IPPO) Director PSSupt. Marlon Tayaba, iya ginpahayag nga nakatawag sa iya si Cong. Garin tuhoy sa nagalapta nga assasination plot kay PO3 Macaya.
Suno kay Tayaba, gin-athag sa iya ni Cong. Garin nga wala sila sang may ginsugo nga gun for hire halin sa Negros Occidental nga amo ang magapatay sa imbestigador sang Guimbal Municipal Police Station.
Sa pihak sini suno sa IPPO Director, ila nga ginpanugyanan si PO3 Macaya nga maghalong bisan nga ginpanginwala kag gin-athag sang pamilya Garin nga wala sila sang tuyo nga ipapatay ang pulis.
Wala man ginadula sang IPPO Director ang posibilidad nga sakyan sang iban ang isyu agud nga idu-on ang pamilya Garin.