Ginkumpirma ni Pope Francis nga patigayunon na sa Abril 2025 ang kanonisasyon sa 15-anyos nga solterito nga si Carlo Acutis nga magahimo sang maragtas bilang una nga millennial kag digital-era saint sang Catholic Church.
Suno sa Santo Papa, iga-proklamar niya si Acutis bilang youngest contemporary saint kadungan sa Jubilee of Adolescents sa Vatican sa April 25-27.
Sunod nga ginkumpirma sang Vatican officials nga himuon ang canonization Mass sa April 27.
Mga Italyano ang ginikanan ni Blessed Carlo Acutis, nabun-ag siya sa London, kag nakilala bilang isa ka web designer antes napatay sa balatian nga leukemia sa Italya sang Oktubre 12, 2006.
Ginpatigayon ni Pope ang beatification sa iya sang 2020 sa Assisi.
Ginakabig siya nga “patron saint of the internet” kag “the first millennial saint” bangud sa iya paggamit sa iya natural tech talent nga maghimo sang website nga naga-dokomento sang reports sang mga milagro sa nagkalin-lain nga bahin sang kalibutan kag gintatap man ini nga website para sa local Catholic organizations.
Masami siya nagasuksok sang jeans kag trainers kag nagahampang sang video games kaangay sang Halo, Super Mario kag Pokémon, kag iban pa nga aktibididad nga gina-enjoy sang sini nga henerasyon. Ang iya istorya ang ginapanan-aw nga makabulig sang daku sa Catholic Church agud nga mas makapalapit sa mga kabataan sa digital age bangud sa pagka-popular man sini sa Catholic youth groups.
Ang 2025 Jubilee kun san-o himuon ang canonization amo ang isa ka Holy Year nga tradisyonal nga nagakatabo sang isa ka bes lamang sa sulod sang 25 ka tuig.
Ginalauman nga sa sini nga tion, 30 million ka tumuluo ang magakadto sa Roma agud nga magpangayo sang kapatawaran sa ila nga mga sala.
Ang approval nga ginhatag ni Pope Francis kag sang College of Cardinals sang nagligad nga Hulyo 1 para sa kanonisasyon ang makabig nga pormalidad bangud sang Mayo 23, matandaan nga ginkumpirma na sang Vatican ang ikaduha nga milagro nga naangot sa intercession sang solterito nga isa ka prerequisite para sa pagka-santo.
