Gintumba ni Emmanuel “Jimuel” Pacquiao, Jr. si Darrick Gates sang Ireland sa ikaduha nga round sang ila four-round lightweight bout subong nga adlaw sa Temecula, California, USA.
Ini ang ikaduha nga professional bout ni Jimuel, apang ini ang una nga na-rehistro nga kadalag-an matapos nagtakop sa majority draw ang iya debut sang Nobyembre.
Nakatindog pa ang 36-anyos nga former MMA fighter antes ang count of 10, apang nangluya na sa pwersa sang 25-anyos nga Filipino prospect nga nagpuntariya sang iya lawas.
Sa ikaduha sini nga pagluhod, nabudlayan na ini nga magtindog rason nga gin-untat na sang referee ang hampang.
Nagsaka na ang professional record ni Jimuel sa 1-0-1, samtang 0-2 slate naman ang record ni Gates.
Pagkatapos sang sambuwa, gilayon nga nagsaka sa ring si eight-division world champion Manny Pacquiao agud maghakos kag magpanginbulahan sa iya subang nga anak.
Ang co-main event sa amo nga hampang naga-feature man sa Pinoy boxer nga si Pedro Taduran. Nadepensahan sini ang iya IBF minimumweight title matapos gintumba ang Mexican contender nga si Gustavo Perez Alvarez sa 7th round.#
