Ginalantaw sang Philippine Atmospheric, Geophysical and Astronomical Services Administration (PAGASA) nga duha tubtub tatlo ka bagyo ang magasulod sa Philippine Area of Responsibility (PAR) subong nga bulan samtang masako man nga ginapreparahan ang pag-abot sang La Niña phenomenon.
Suno sa state weather bureau, yara na subong ang pungsod sa neutral condition.
Padayon man nga magaapekto sa Pilipinas ang easterlies ukon ang mainit nga hangin halin sa Pacific Ocean. Ginalantaw nga magadala ini sang pag-ulan sa Davao region samtang posible naman ang isolated rains sa nabilin nga bahin sang pungsod sa hapon kag sa gab-i.
Sa subong, wala pa sang bagyo ukon low-pressure areas nga na-monitor sa guwa sang PAR.
Sa Agusto tubtub sa Oktubre, gina-forecast naman sang weather bureau nga tubtub man sa tatlo ka bagyo ang magaabot sa Pilipinas samtang isa tubtub duha naman sa Nobyembre kag sa Disyembre.
Una na nga gin-anunsyo sang PAGASA nga posible nga maatrasar sa ulihi nga quarter sang 2024 ang pagsugod sang La Niña sa pungsod.
