Nagdangat na sa 10.8 million nga mobile number ang na-blacklist na, samtang 2.3 million naman nga SIM cards ang na-deactivate subong nga tuig sa diin ginadudahan nga ginagamit ang mga ini sa cyber fraud.
Sa Senate plenary budget deliberations, ginpahayag sang Department of Information and Communications Technology (DICT) nga ginpunggan sang National Telecommunications Commission (NTC) ang masobra 2.2 billion nga text messages nga ginpadala sang mga scammer nga naangot sa nagkalain-lain nga fraudulent activities.
Suno kay Senador Sherwin Gatchalian, sponsor sang budget sang DICT para sa 2025, gin-ugyunan sini ang mando sang NTC sa mga telco nga mangin hugot sa pag-isyu sang SIM cards.
Ginpahayag sang senador nga ginmanduan na sang state regulator ang mga telco nga i-upgrade ang ila teknolohiya agud matumod ang fraudulent registration sang SIM cards, kasunod sang report sang National Bureau of Investigation (NBI) nga nakaparehistro sang SIM card gamit ang picture sang isa ka amo.
