Magapungko bilang mga testigo sa impeachment trial ni Vice President Sara Duterte umpisa subong nga adlaw, Septyembre 1, ang duha ka military officers.
Ini bilang kabahin sang tyempo sang House prosecution panel nga mapamatud-an ang alegasyon sang pag-abuso sa confidential funds sang yara pa si Duterte sa Department of Education (DepEd).
Sa request sang House prosecution panel, nagpagwa sang subpoena ang Senate impeachment court para kay Colonel Manaros Boransing II kag Colonel Magtangol Panopio.
Ginalauman nga magahatag sila sang testimonya kaangot sa military certifications nga gin-submit sang Department of Education ukon DepEd sa pagsabat sa mga pamangkot sang Commission on Audit ukon COA kaangot sa paggamit sang confidential funds.
Sa 2024 hearing sang House Committee on Good Government and Public Accountability, may mga military officers nga nagpahayag nga wala nakabaton sang confidential funds halin sa DepEd ang ila mga unit para sa mga aktibidad nga ginlakipan sang amo nga certifications.
Nag-gasto ang DepEd sang kabug-osan nga 112.5 million pesos nga confidential funds sa una nga tatlo ka quarters sang 2023.
Ang duha ka military officers kabahin sang mga testigo nga gintawag sang prosecution matapos nga nangin temporaryo nga indi available si anay DepEd special disbursing officer ukon SDO Edward Fajarda. Si Fajarda kuntani ang isa ka hostile witness apang indi pa makapungko subong sa korte bangud ginapahayag nga na-stroke.#
