ILOILO CITY- Nalubong na ang 2-anyos nga bata nga babaye nga napatay matapos ginlampos sa pader sang yaya sini sa ­Quezon City.

Gilayon nga ginpalubong ang bata nga si Baby Abby, matapos nag-abot ang iloy sini nga OFW nga nagatrabaho sa Libya bilang kabulig sa balay.

Base sa report, ala-una sang hapon sang Sabado sang nag-abot sa Pilipinas ang iloy sang bata.

Bangud nga wala sang pamasahe, mismo ang mga tinawo sang Quezon City Police District (QCPD) kag mga kabarangay ang nagsugat sa iloy gikan sa paluparan kag gin-updan ini sa ospital kun sa diin nakahaya ang bangkay sang bata.

Sang makuha ang bata gikan sa ospital, gindala ini sa mosque sang Brgy. Culiat, Quezon City para masunod ang ritwal sang paglubong sang mga Muslim sa sulod sang 24 oras.

Bangud nga walaman sang igasto sa pagpalubong, ginhingyo na lang anay ang pamunuan sang patyo nga tugutan ng malubong ang bata apisar wala sang bayad.

Samtang, ginkumpirma naman sang QCPD nga napasaka na ang kaso nga murder kag child abuse sa suspek nga si Rowena Daud, 36, nga nagatatap sa bata kag ginapatihan nga amo ang nakapatay diri.

Base sa rekord sang PNP, Miyerkules sang gab-i sang gindala mismo ni Daud sa ospital ang bata.

Ginpahayag ni Daud nga nahulog ang bata sa hagdan apang duda ang mga pulis bangud madamo sang pilas kag lagub ang bata.

Sang ulihi, gin-ako man sang suspek sa mga imbestigador nga ginakastigo niya ang bata.

Suno sa suspek, natak-an ini bangud magluwas sa biktima, ginatatap man niya ang utod sini nga 8 ka bulan nga lapsag kag ang tatlo pa niya nga kaugalingon nga anak.

Natukiban man sang mga pulis nga posible nga ginmolestiya pa ang biktima bangud nagabanog ang kinatawo sini rason kun ngaa ang anak nga lalaki ni Daud, nga una nga nagpalagyo kag nagpanago ang ila man arestuhon.

Base sa rekord, Dis­yembre 2021 lang sang nagbiya sa Pilipinas ang iloy sang biktima agud magtrabaho sa luwas sang pungsod kag ginbayaan ang mga anak sa iya nga recruiter.

Apang,sang ulihi, ginkuha ni Daud nga abyan sang OFW ang biktima kag utod sini apang wala naglaum nga ini ang himuon sang suspek sa iya anak.