ILOILO CITY – Lunsay loose firearms ukon indi rehistrado ang duha ka armas nga gingamit sa twin shooting incident sa syudad sang Iloilo sang damlag lang.
Ini ang natukiban matapos ang ginpatigayon nga Ballistic Examination kag Integrated Ballistics Identification System sa nakuha nga recoveries sa crime scene.
Sa interview sang Bombo Radyo kay Police Col. Enrique Ancheta, pinuno sang Regional Crime Laboratory 6, iya ginpahayag nga kumpirmado nga nagsanto ang armas nga gingamit sa pagpatay kay Alain Muller sa Brgy. Cuartero sa distrito sang Jaro kag kay Delfin Britanico sa Brgy. Nabitasan sa distrito sang La Paz.
Suno kay Ancheta, natukiban nga ang 9mm kag .45 caliber pistol ang gingamit man sa krimen nga natabo sang Abril 18, 2012.
Ang masubo lang suno kay Ancheta amo nga indi rehistrado ang mga armas rason nga indi matumod kun sin-o ang tag-iya sini.
Samtang, nagtukod naman sang special investigation task group ang Police Regional Office 6 may kaangtanan sa natabo nga twin shooting incident.
Sa interview sang Bombo Radyo kay Police Lt. Col. Joem Malong, tagpamaba sang Police Regional Office 6, iya ginpahayag nga sa subong, wala pa sang memorandum nga ginpaguwa ang Regional Director apang ang masami nga nagapamuno sa special investigation task group amo ang Deputy Regional Director for Operations.
Suno kay Malong, ang National Bureau of Investigation na ang nagapatigayon sang imbestigasyon sa kaso ni Britanico apang indi man mahimo nga pabay-an sang Police Regional Office 6 ang natabo nga twin shooting incident ilabi na nga duha ang napatay.
Ginpahayag ni Malong nga mas makapaayo nga madamu nga ahensya sang gobyerno ang nagapatigayon sang imbestigasyon agud nga madali nga masolbar ang kaso.
