ILOILO CITY – Ginpadangat sa hospital ang duha ka back rider matapos nagdasok sa atubang sang Tamaraw FX ang ila ginsakyan nga motorsiklo sa Jalandoni, Jaro, Iloilo City.
Sa nasambit nga aksidente, naulamid man ang isa pa gid ka Taxi unit nga ginamaneho ni Arnel Olvido, 35, sang Brgy. San Pedro, Jaro, Iloilo City.
Ang driver sang motorsiklo amo si Leopoldo Ladogdo, 36, sang Zamora‑Melliza, Iloilo City samtang ang mga back rider naman amo sanday Arthur Ortaliz, 34 sang Parc Regency, Pavia, Iloilo kag Kenneth Geniz, 37, sang Brgy. Ortiz, Iloilo City.
Sa interview sang Bombo Radyo kay Benar Nuñez, tag-iya sang pribado nga salakyan, iya ginpahayag nga ang iya anak ang nagamaneho sang salakyan.
Suno kay Nuñez, nag-agaw sa linya ang motorsiklo kag nagsuhot sa pangunahan sang Tamaraw FX.
Ang duha lang ka back rider sang motorsiklo suno kay Nuñez ang nakaangkon sang pilas kag yara naman sa maayo nga kahimtangan.
Samtang, ginpahayag sang natungdan nga sang iya ginbuksan ang back seat door sang salakyan, naigo ang Taxi nga nag-agi lang sa lugar.
