ILOILO CITY – Ginlamon sang kalayo ang duha ka mga balay sa Barangay Monica Blumentritt, Iloilo City Proper kagab-i.
Sa interview sang Bombo Radyo kay Punong Barangay Totong Espinosa, iya ginpahayag nga nag-umpisa ang kalayo sa balay ni Margie Bronzal kag naglapta ini sa isa man ka balay nga ginapanag-iya sang isa ka pulis.
Suno kay Espinosa,bangud nga wala sang kuryente sa balay ni Bronzal, kandila lamang ang ginagamit sini kag posible nga ini ang kabangdanan sa pagluntad sang sunog.
May yara naman sang pilas sa wala nga kamot kag dapa-dapa si Bronzal tuga sang pagkapaso sa kalayo.
Suno sa iya, samtang nagahigda siya sa ika-duha nga panalgan sang iya balay, nakibot siya nga nagakalayo na ang iya nga uluhan.
Pahayag ni Bronzal, ginbutang niya sa garapon ang kandila kag posible nga wala niya matalupangdan nga natunaw na gali ini.
