ILOILO CITY–Nagwangal si Iloilo City Plaridel Nava matapos gindakop sang indi magnubo sa 20 ka mga pulis ang duha sini ka mga bodyguards sa sulod sang Iloilo City Hall.
Lakip sa mga gindakop sang pulis sanday Roy Delos Reyes, 43 anyos kag Tata Delos Reyes, 34 anyos.
Ang duha ang ginatudlo nagpangamot sa pagpatay sa pakaisa sang konsehal kag pinuno sang Amazona bridgae nga si Mercedes “Ging Ging” Nava, sa Calajunan Mandurriao, Iloilo City.
Ginkwestyon naman ni Nava ang pagdakop sa iya duha ka mga bodyguards nga wala sang warrant of arrest.
Samtang, nagapati naman si Mrs. Sara Delos Reyes, iloy nanday Tata kag Roy Delos Reyes, nga naulamid lang ang iya mga kabataan.
Ini bangud si Konsehal Nava ang ginatudlo suspek sa pagpatay sa pakaisa nga si Ging Ging Nava.
Ginkumpirma sang pamunuan sang Iloilo City Police Office (ICPO) nga ang mga bodyguards ni Iloilo City Councilor Plaridel Nava amo ang gintudlo sang ila mga witness nga nagpangamot sa pagpatay sa pakaisa sang konsehal nga si Mercedes “Ging Ging” Nava nga lider sang Amazona brigade.
Sa interview sang Bombo Radyo kay ICPO Director S/Supt Martin Defensor Jr., ginpahayag sini nga santo sa ila pagpangusisa sa mga witness, positibo nga gintumod sanday Roy Delos Reyes43  kag Tata Delos Reyes nga suspek sa krimen.
Nakuha sa duha suno kay Defensor ang tatlo ka mga 45 caliber pistol kag isa ka granada.
Ginkwestyon man ni Defensor kun paano nga nakasulod ang duha sa Iloilo City Hall nga may dala nga mga armas.