ILOILO CITY – Ginabanta P200,000 nga balor sang illegal drugs ang nakuha gikan sa duha ka mga durugista nga nadakpan sa buy bust operation sa Brgy. Banuyao, La Paz, Iloilo City.
Sa interview sang Bombo Radyo sa team leader sang Regional Police Drug Enforcement Unit, iya ginpahayag nga ang subject amo si Jonathan Pagunaling Atanacio alyas Jojo, 43 anyos, kasado sang Brgy. Rizal Estanzuela sa City proper samtang ang isa pa gid ka nadakpan amo si Sotero Magalonia Esparagoza, 45 anyos, kasado sang Brgy. Banuyao sa distrito sang La Paz.
Suno sa RPDEU team leader, pito ka sachet sang suspected shabu ang nakuha nga ginalakipan sang duha ka magaagmay kag lima ka dalagko nga sachet samtang nagalab-ot naman sa P20,200 ang buy bust money.
Ginpahayag sang RPDEU team leader nga nagapadulong sa balay ni Esparagoza ang subject sang buy bust nga si Atanacio kun sa diin ginapahayag nga sa Metro Manila naghalin ang supply sang illegal drugs.
Magluwas sa illegal drugs kag buy bust money, may nakuha man nga kwarta nga ginapatihan kinitaan ni Atanacio nga isa na ka bulan nga gina-monitor.
Sakop man sang monitoring ang iban pa nga mga kaupdanan sang duha ka durugista.
Ginkadismaya naman ni Punong Barangay Ruby Ann Geanga ang pagkadakop sa duha ka durugista bangud candidate for drug clearing ang Banuyao.
Ginpahayag ni Geanga nga ginkakibot niya nga naulamid sa buy bust operation ang iya residente nga si Sotero Magalonia Esparagoza bangud nga wala man ini sang record sa ila barangay.
