ILOILO CITY – Nakadepende sa resulta sang imbestigasyon ang mangin pamatbat sa duha ka mga empleyado sang Human Resource Department sang Iloilo Provincial Capitol nga nag-iskandalo sa tunga sang ila trabaho.
Sa interview sang Bombo Radyo kay Alma Ravena, Human Resource head sa kapitolyo, ginpahayag niya nga madugay na nga wala nagaintyindihanay ang messenger nga si Roselle Dalida kag HR assistant nga si Helen Felicio.
Sa inisyal nga imbestigasyon, ginpahayag ni Ravena nga nag-umpisa sa interpretasyon sang panulok ang inaway tubtob nga nagtaasay sang tingog ang duha kag nag-sakitanay.
Gindugang pa gid ni Ravena nga posible labi nga nagsingki-anay ang duha tungod ginapahayag yara na sa menopausal period ang mga ini.
Ginpili na lang sang HR nga papulion si Dalida agud indi na masulit pa ang kinagamo.
Nakahanda naman ang Human Resource suno kay Ravena nga panaugan sang disciplinary action ang duha ilabi na nga mismo si Governor Arthur Defensor Sr. ang maluyag nga disiplinahon ang mga ini.