Wala ginpahanugotan sang duha ka mga barangay sa Iloilo City Proper ang ginpatigayon nga caucus sang Team Sulong Gugma ni Iloilo City Lone District Representative Julienne “Jamjam” Baronda.
Ini amo ang Barangays Veterans Village kag Zamora-Milleza.
Sa interview sang Bombo Radyo kay Stanley Flores, Iloilo City Councilor Aspirant, iya ginpahayag nga ginproseso na nga daan ang ila permit sa Iloilo City Hall sang pila ka mga opisyal sang Brgy. Zamora-Milleza, City Proper apang, wala ini gin-issue sa adlaw mismo sang patigayunon kontani nga campaign rally.
Suno kay Flores, kontani ginkonsiderar lang man sang city hall ang mga pumuluyo nga nagpadulong kag nagpreparar para sa amo nga kahiwatan.
Ginpabutyag man sini nga gin-una pa sang city government ang ila ikasarang batok sa mga pumuluyo sang nasambit nga lugar.
Ginlaragway man sang natungdan bangud sa natabo, na-akig ang mga pumuluyo sang Brgy. Ortiz, Zamora-Milleza, kag Concepcion nga nagpadulong gid agud magpakita kontani sang ila nga suporta.
Gin-alegar na man sang pila ka mga Team Sulong Gugma leaders nga ginpamatyan sang kuryente ang ila pwesto sa Veterans Village agud kontani hiwatan man sang rally.
Ginkwestyon na man ni Iloilo City Councilor Aspirant
Atty. Kesha Pesina ang nangin dalagan sang proseso sang ila permit to rally.
Suno kay Pesina, tuman ka dugay ang pag-grant sang ila permit nga sapagkamatuod, mahapos kag madasig lang man kontani i-proseso.
Gin-athagnaman ni Punong Barangay Lloyd John Abadiano sang Brgy. Zamora-Melliza, Iloilo City Proper nga inadlaw antes ang caucus sa nasambit nga lugar, nakasumiter sa ila sang letter ang opisina ni Representative Jamjam Baronda.
Sa interview sang Bombo Radyo kay Abadiano, iya ginpahayag nga may yara na sang permit sa barangay ang Team Sulong Gugma agud gamiton sa nasambit nga kahiwatan apang, wala sang permit nga nakuha halin sa city government.
Ginklaro man sini nga wala nila ginpunggan ang nasambit nga grupo sa pagpatigayon sang caucus.
Suno kay Abadiano, nagasunod lamang sila sa pagsulundan sang city government kag sang Commission on Election (COMELEC).
Gin-athag man sang natungdan nga nakalatag na kontani ang gym sang barangay para gamiton sa kahiwatan.
