ILOILO CITY – Duha ka elected official sa syudad sang Iloilo ang naghimu sang lihok agud nga matapna ang madata nga suicide incident.
Sa interview sang Bombo Radyo kay Iloilo City Councilor Love-Love Baronda, chairman sang Committee on Education, iya ginpahayag nga luyag niya nga magpatukod sang Positivity Club sa tagsa ka Elementary kag High School, pribado man ukon pampubliko nga buluthu-an.
Suno kay Baronda, luyag niya nga tutukan kag pasangkaron ang mental health awareness sa bulig sang mga professional.
Ginpahayag ni Baronda nga may yara sang committee hearing nga patigayunon agud nga mahibalu-an kun paano ipatuman ang iya ginaduso nga programa.
Samtang, nagpasar naman sang resolusyon si Iloilo City Councilor Alan Zaldivar, chairman sang Committee on Health, nga nagasentro sa pagtapna sang suicide incident.
Suno kay Zaldivar, katuyu-an sang iya ginpasar nga resolusyon amo nga dapat pangunahan sang Department of Education kag Commission on
Higher Education ang tanan nga educational institution nga maghimo sang lihok agud nga tutukan ang mental health awareness sang mga estudyante.
Ginpahayag ni Zaldivar nga indi lamang ang mga may yara sang deperensya sa panghuna-huna ang mga naga-suicide kundi lakip man ang mga nagabatyag sang depresyon.
Ang suicide suno kay Zaldivar ang ginakabig nga isa ka seryoso nga public health problem.
