ILOILO CITY- Pabor ang duha ka mga Ilonggo nga mamalidha sa ginaduso nga postponement sang Barangay kag Sangguniang Kabataan elections nga natalana kuntani sa palaabuton nga Disyembre.
Ini amo sanday Iloilo 2nd District Representative Michael “Mike” Gorriceta kag 5th District Representatives Raul “Buboy” Tupas.
Sa interview sang Bombo Radyo kay Representative Michael Gorriceta, iya ginpahayag nga tama na ka ubol sang tiempo agud preparahan ang nasambit nga eleksyon.
Suno kay Gorriceta, kun dayunon ang eleksyon, mangin kabangdanan inio sang pagbinahin-bahinay sang mga pumuluyo sa barangay gani mas maayo nga magtutok anay sa pag-atubang sa mga problema sang mga pumuluyo sa baylo sang politika.
Suno naman kay Rep. Raul Buboy Tupas, ginapanan-aw niya nga mas paborable kun wala anay sang eleksyon agud indi ma-hamper ang continuity sang delivery sang social services.
Pahayag niya, ang P8.6 billion nga budget para sa amo nga eleksyon ang mahimo nga gamiton nalang sa pagbulig sa kinahanglanon sang mga pumuluyo sa tunga sang pandemya kag krisis nga ginapangatubang sang pungsod.
