ILOILO CITY – May duha na ka Korean Companies nga gin-accredit agud magpasa sang detailed engineering design sa para sa Panay-Guimaras-Negros bridge.
Ang interisland bridges project ang nagalakip sa pagtukod sang duha ka sea-crossing kag four-lane bridges nga nagalaba sang 32.47 kilometers nga amo ang magakonekta sa Panay, Guimaras, kag Negros sa Western Visayas.
Sa interview sang Bombo Radyo kay former Sen. Franklin Drilon, iya ginpahayag nga ginalauman nga ipasa na sang duha ka mga kumpaniya sa madason nga bulan ang ila tagsa ka mga detailed engineering design.
Sa Disyembre i-award naman ang kontrata sa mapilian nga kumpaniya.
Suno kay Drilon, nakabayluhanay na ang Pilipinas kag ang South Korea sang kopya sang agreement para sa utang nga gin-extend sang Export Import Bank of Korea-Economic Development and Cooperation Fund nga amo ang magasabat sa engineering services sa amo nga proyekto.
Ang ipa-loan para sa nasambit nga proyekto ang ginalauman nga gastuhon para sa preliminary design, detailed engineering design kag procurement assistance.
Ang ini nga zero-interest loan ang may 0.1 percent service charge per disbursement ang may maturity period nga 40 years, lakip na ang 10-year grace period.
Apang suno kay Drilon, ang sigurado anay nga una nga pondohan amo ang Panay-Guimaras bridge.
Ginalauman nga maga-umpisa ang engineering services sa P187.54 billion nga Panay-Guimaras-Negros Island Bridges Project subong nga tuig kag maumpisa ang construction sa tuig 2025.
