Duha pa ka mga lawas ang nasapwan kasunod sang nagluntad nga mudslide sa Atami City sa southwest sang Tokyo, Japan.
Matandaan nga sa natabo nga mudslide, 300 ka mga balay ang kumpirmado nga apektado.
Padayon man nga ginapangita ang kapin 20 ka mga indibidwal nga una nga gindeklarar sang local authorities nga missing.
Suno kay Bombo International Correspondent Josel Palma direkta sa Japan, kumpirmado nga lunsay mga babaye ang duha ka lawas nga nasapwan.
Pahayag ni Palma, bag-o gindeklara sang mga otoridad nga patay na ang duha, ginpaidalom pa ang mga ini sa cardio kag respiratory arrest apang wala na natabangan pa.
Sa subong, gin-alerto ang mga pumuluyo bangud may forecast nga nagagwa nga magabubo pa ang mamunog nga pag-ulan sa Atami City sa diin dako ang posibilidad sang pagluntad sang landslide.
Bangud sini, nagmando na si Prime Minister Yoshihide Suga sa emergency services kag militar agud maglunsyar sang rescue kag evacuation missions.
Una naman nga nagpasalig ang Prime Minister nga ang police, fire department service, Japan Coast Guard, kag Japan Self-Defense Forces ang nagabululigay agud nga nga makaresponde sa mga apektado.
Nagdangat naman sa malapit sa 400 ka mga indibidwal ang ginpang-evacuate sa 10 ka evacuation centers sa Atami City.
