ILOILO CITY – Luwas na ang duha ka manugpangisda nga na-rescue matapos nagkapan ang ila fishing boat sa kalalawran nga sakop sang Nauway Island, Sto. Domingo, Sibunag, Guimaras bangud sang dalagko nga balod.
Ang mga biktima amo sanday Goiyon Noynoyan kag Andrew Dela Cruz nga sakay sa Sea Prince 2 fishing boat.
Sa interview sang Bombo Radyo kay Chief Petty Officer Albino Rodriguez, deputy commander sang Coast Guard Iloilo Station, antes nagkapan ang fishing boat, nakapadala pa sang text message si Noynoyan sa iya utod nga katapo sang Philippine Coast Guard kag na-assign sa Metro Manila.
Gilayon naman ini ginpahibalo sang utod ni Noynoyan sa MDRRMO, Bantay Dagat kag Philipine Coast Guard Sibunag para maluwas ang mga biktima.
Naluwas ang duha matapos na-rescue sang nag-agi nga isa pa gid ka fishing boat nga FBCA Justin II.
Ang nagkapan nga fishing boat ang ginguyod naman padulong sa higad sang baybay sang Nauway Island.