ILOILO CITY – Mabudlay sabton ang tuhoy sa ginapahayag ‘5 plus 1’ nga salakyan nga ginbakal sang syudad sang Iloilo nga ginagamit nga mayor’s quick response team sang Public Safety and Transportation Management Office (PSTMO).
Sa interview sang Bombo Radyo kay Mr. Joren Sartorio, pinuno sang General Services Office (GSO), iya ginpahayag nga nakabati siya sang huring-huring tuhoy sa ‘5 plus 1’ nga salakyan nga ginbakal sang syudad sang Iloilo.
Sa bahin sang GSO, ginpahayag ni Sartorio nga duha lang ka mga salakyan ang nag-agi sa bidding sang Bids and Awards Committee (BAC).
Ang pondo nga gingamit sa pagbakal sang mga salakyan ang ginkuha sa general fund ukon sa peace and order fund.
Gintudlo naman ni Sartorio sa PSTMO ang responsibilidad sa pagpaathag kun ano gid ang kamatuoran tuhoy sa ginpangbakal sang salakyan para sa mayor’s response team.
Samtang, sa pagpaathag naman ni Mr. Jeck Conlu, pinuno sang PSTMO, wala siya nakahibalo tuhoy sa proseso sang pagbakal sang mga salakyan.
Sang una suno kay Conlu, ang PSTMO ang nagadumala sa nasambit nga mga salakayan apang bag-o pa man ang election period, indi na personnel sang PSTMO ang nagadumala sini.
May kaangtanan diri, ginpanginwala ni Mr. Darwin Papa, operations manager sang City Disaster Risk Reduction and Management Office (CDRRMO), nga sa ila opisina naghalin ang gingamit nga kwarta sa pagbakal sang duha ka salakyan para sa mayor’s quick response team.
Sa pagpaathag ni Papa, ang pondo sang CDRRMO ang ginagamit kun ini ang para lamang sa ila opisina ukon sa disaster related operations.
Ang ila lamang nga ginbakal suno kay Papa amo ang duha ka firetruck nga ginhatag sa Bureau of Fire Protection (BFP) kag wala na sang iban pa.
Yari ang pagpahayag ni Sartorio tuhoy sa ginapahayag ‘5 in 1″ nga salakayan nga ginbakal sang syudad sang Iloilo:
Samtang, yari naman ang pahayag ni Papa tuhoy sa nasambit nga isyu:
