ILOILO CITY–Nakapyansa ang media personality nga si Peter Jimenea matapos ginserbehan sang warrant of arrest kaupod ang isa pa gid ka media personality nga si Reymar Latoza sang iloilo Metropolitan Times.
Ang duha ang ginserbehan sang Warrant of Arrest bangud sa kaso nga libel.
Sa interview sang Bombo Radyo kay Jimenea, iya ginpahayag nga nakibot siya sang ginserbe sa iya ang warrant of arrest nga ginpaguwa ni Judge Mario Andres Jr. sa Antique.
Ginpahayag ni Jimenea nga ginhulat gid siya sang mga katapo sang Molo PNP sa Hotel Del Rio kun sa diin siya nagapatigayon sang iya programa.
Ginadudahan naman ni Jimenea nga si certain Ernesto Eco alyas Erning Ati sang Antique ang nagpasaka sa iya sang kaso.
Ini bangud nga si certain Erning Ati ang iya sadto ginhingadlan nga drug lord sa iya ginsulat nga news article sang 2016.
Depensa ni Jimenea nga may yara siya sang basehan sa iya pagsulat sang nasambit nga news item batok sa ginatudlo drug lord.
Ang basehan nga gingamit ni Jimenea sa pagsulat sang news item amo ang ginsulat man sadto ni certain Rey Alcarde sang 1999 sa lokal nga mga pamantalaan.
Sa pihak sini, handa naman ang Media Personality nga atubangon ang kaso nga ginpasaka batok sa iya.
Nahibalu-an nga balor 10,000 pesos ang pyansa batok kanday Jimenea kag Latoza.
Ginapahayag nga wala pa nabaton ni Latoza ang iya warrant of arrest.
Ang warrant of arrest ang napetsahan sang March 20, 2018 apang sang sini lang nabaton sang Molo PNP kag ginserbe batok sa duha ka akusado.