Temporaryo nga ginhatagan sang kahilwayan ang duha ka mga menor-de-edad nga ginapahayag naglugos sa 15-anyos nga babaye sa banwa sang Sta. Barbara, Iloilo.
Sa interview sang Bombo Radyo kay Police Major Ciarco Esquilarga, hepe sang Sta. Barbara Municipal Police Station, iya ginpahayag nga nagdesisyon ang Municipal Social Welfare and Development Office (MSWDO) kag ang talatapan nga paulion kag ibalik sa ginikanan ang duha ka mga menor-de-edad.
Suno kay Esquilarga, ang desisyon ang ginbase man sa mando nga ginpaguwa sang Provincial Prosecutor’s Office samtang padayon pa nga ginapadalman ang kaso.
Lakip na ang mahimo intervention nga ipatuman sang talatapan sa mga menor-de-edad nga suspek.
Gin-athag man sini nga ang 21-anyos nga suspek ang nagapabilin nga yara sa kustodiya sang Sta. Barbara Municipal Police Station.
Nahibaluan nga Nobyembre 27 sang ginpasaka ang kaso nga rape nga nagalapas sa RA 7610 ukon Act Providing for Stronger Deterrence and Special Protection Against Child Abuse, Exploitation and Discrimination.
Kon balikan, naghagaray nga maglagaw ang mga suspek lakip na ang biktima, kon sa diin nag-inom-inom sang makahulubog nga ilimnon tubtob nga natabo ang insidente.
