JARO, ILOILO CITY – Napasakaan na sang kaso ang duha ka suspek sa pagpatay sa isa ka myembro sang LGBTQIA+ nga nasapwan-patay sa iya apartment sa Zone 1, Jalandoni St., Brgy. Our Lady of Lourdes, Jaro, Iloilo City.
Ang biktima amo si alyas Victor Lorca, isa ka nurse, kag tumandok sang Maasin, Iloilo.
Sa interview sang Bombo Radyo kay Police Captain Melchor Tolentino, iya ginpahayag nga kaso nga Robbery with Homicide kag paglapas sa Anti-Carnapping Act of 2016 ang ginpasaka sa duha ka suspek.
Nahibaluan nga magluwas nga ginkawatan ang biktima sang iya cellphone kag alahas, gindala pa gid ang iya motorsiklo.
Suno kay Tolentino, ang duha ka mga suspek ang nakit-an sa Closed-Circuit Television (CCTV) footage sa lugar
kun sa diin natabo ang krimen.
Nagpamalibad naman ang hepe nga pangalanan ang mga suspek sa rason nga yara na ang kaso sa Prosecutor’s Office.
