Gina-verify sang gobyerno sang Pilipinas ang reports nga may mga Pinoy nga gin-aresto sa Dubai bangud sa pag-share sang online content nga naangot sa atake kag air defense interceptions sa United Arab Emirates.
Suno sa Philippine Embassy sa Abu Dhabi kag Consulate General sa Dubai, ginakuha pa ang opisyal nga kumpirmasyon halin sa lokal nga awtoridad kaangot sa identity, status, kag legal circumstances sang mga involved nga duha ka Pinoy.
Sa statement sang embahada kag consulate, ginsiling nga gina-respeto sini ang soberanya sang UAE kag ang ila kinamatarong nga ipatuman ang ila layi nga naangot sa national security, cybercrime, kag public order.
Ginapahanumdom man sa overseas Filipino workers (OFWs) nga magtuman gid sa layi sang pungsod kun sa diin sila naga-trabaho kag mangin mahinalungon sa paggamit sang social media kag messaging platforms.
Gina-abisuhan man sang embahada ang mga Pilipino nga likawan ang pag-rekord, pag-post, pag-forward, kag pag-komento sa indi beripikado ukon sa mga sensitibo nga security-related content agud malikawan ang paglapta sang rumor sa mga impormasyon nga indi pa man sigurado.
Istrikto nga ginadumilian sang UAE ang pag-share sang misleading ukon fabricated security-related content lakip na ang videos sang air defense interceptions, mga pagpang-atake sa ila landmarks, kag AI-generated false footage.
Ginakabig ini nga criminal offense nga mahimo silutan sang pagka-preso kag substantial fines.
Nahibaluan nga nagaguwa subong sa reports nga sa 25 nga naaresto bangud sa pag-share sang content sang pagpang-atake sa ila pungsod, duha ang Pinoy samtang may iban man nga nationalities kaangay sang Indians, Pakistanis, kag Bangladeshis.
Isa ang UAE sa naka-eksperyensya sang missile kag drone attacks halin sa Iran halin sang nagsugod ang gyera sang Pebrero 28.
