ILOILO CITY- Pilason ang duha ka pulis sang Carles Municipal Police Station matapos ginbuno kag ginlabo sang wanted person nga ila ginserbehan sang warrant of arrest.
Ang mga biktima amo sanday Police Staff Sergeant Michael Ilanga kag Police Corporal Godfrey Punsalan.
Nagpadulong ang mga ini sa balay sang subject sang warrant of arrest sa kaso nga Oral Defamation kag Threats nga si Rogelio Pancho sa Brgy. Cabilao Grande, Carles, Iloilo.
Pag-abot sa sang duha ka pulis sa balay sang subject, hinali lang nga ginbuno ni Pancho si Ilanga nga naigo sa duha niya ka paa.
Nagdalagan kag nagsulod si Pancho sa iya kwarto kag sang nakumbinse ini nga magsurrender, hinali lang nga ginlabo sini si Punsalan nga naigo naman sa iya tudlo sa kamot.
Didto na nagpukutay tubtob nga nakontrol sang otoridad si Pancho.
Detained na subong si Pancho sa Carles PNP Custodial Facility kag nagapangatubang sang dugang nga kaso nga Resisting Arrest kag Direct Assault Upon Agents of Person in Authority.
Sa imbestigasyon sang otoridad, nagagwa nga nagasuprir ang suspect sang emotional stress kasunod sang kamatayon sang iya asawa.
