ILOILO CITY – Duha ka mga pulis sa Western Visayas ang gina-imbestigaran sang National Police Commission may kaangtanan sa pagpalusot sang makahulubog nga ilimnon apisar sang Liquor ban subong nga may Enhanced Community Quarantine.
Sa interview sang Bombo Radyo kay Atty. Joseph Celis, Director sang National Police Commission 6, iya ginpahayag nga ang duha ka pulis amo sanday Police Staff Sergeant Roy Panaguiton nga na-assign sa San Remegio Municipal Police Station sa Antique kag si Patrolman Arnie Luminario nga na-assign sa Iloilo City Police Office.
Suno kay Atty. Celis, si Panaguiton ang nagpalusot sang makahulubog nga ilimnon paagi sa pagkarga sang wing van sa banwa sang Pandan samtang si Luminario naman ang nadakpan sa Passi City paagi sa pagkarga sa ginapanag-iyahan nga salakyan.
Sa bahin ni Police Staff Sergeant Paul Pingoy nga na-assign sa Regional Intelligence Division kag nadakpan sa Sta. Barbara, ginpahayag ni Atty. Celis nga ang Police Regional Office 6 na ang naga-uyat sang imbestigasyon.
Nagpamalibad ang natungdan nga maghatag sang dugang nga detalye bangud nga padayon ang imbestigasyon.
