Nagapangatubang subong sang kaso nga Alarms and Scandal ang duha ka senior citizens matapos nagpangtiro sa isa ka party hub sa Mandurriao,Iloilo City.
Ang mga arestado amo sanday Gerolen Alave, 63, sang Arevalo, Iloilo City kag Serafin Pendon, 75, sang Pototan,Iloilo.
Sa interview sang Bombo Radyo Iloilo kay Police Corporal Sydney Calata, imbestigador sang Mandurriao Police Station, iya ginpahayag nga ginreklamo ni Welmer Cadano,33, isa ka taxi driver ang duha ka tigulang.
Ini matapos nga gintiro sang mga ini ang windshield sang taxi nga ginamaneho ni Cadano.
Suno sa imbestigador, aksidente nga naatrasan sang pick-up nga ginamaneho ni Alave ang taxi ni Cadano sa diin nagupi ang nalikod nga bahin sang taxi.
Dugang pa sang pulis,naakig ang duha ka tigulang kag nanaug gikan sa front seat sang pick-up si Pendon nga may ginauyatan nga armas kag hinali lang nga gintiro ang nasambit nga taxi.
Madasig naman nga ginbalabagan sang iban nga taxi ang salakyan sang mga suspek gani wala ang mga ini nakapalagyo kag nadakpan sang nagresponde nga pulis.
