Nakit-an ang duha ka ulunan nga may blood stains ukon mantsa sang dugo sa irigasyon sa Barangay Inangayan, Sta. Barbara, Iloilo — lugar kun sa diin nakit-an nga naka-park ang isa ka sports utility vehicle (SUV) nga may unod nga bangkay sang isa ka babaye.
Ang biktima amo si Claire Diergos, 36, residente sang Barangay Dagsaan, Buenavista, Guimaras, kag nagapuyo sa Deca Homes Subdivision sa Pavia, Iloilo.
Sa interview sang Bombo Radyo kay Police Major Reymond Celoso, hepe sang Sta. Barbara Municipal Police Station, iya ginpahayag nga gilayon nga ginturn-over sa Scene of the Crime Operation (SOCO) ang duha ka ulunan nga narekober sa isa ka creek, 800 ka metros ang kalayuon sa salakyan nga naka-park kun sa diin nasapwan ang bangkay ni Diergos.
Suno kay Celoso, sandig sa imbestigasyon sang SOCO sa sulod sang balay sang biktima sa Deca Homes Subdivision, nakitaan man sang bloodstain pattern ang pila ka mga gamit ni Diergos, partikular sa mga pulungkuan kag sa iya mismo nga bedding ukon foam nga ginahigdaan.
Nagapadayon naman ang maid-id nga imbestigasyon sang SOCO kun ang mantsa sang dugo sa duha ka ulunan nga nakit-an sa creek sang Barangay Inangayan amo man ang mga dugo nga nakit-an sa sulod sang balay sang babaye.
Samtang, ginpahayag ni Celeso nga base sa resulta sang autopsy examination sa bangkay sang biktima, natukiban nga duha na ka-adlaw nga napatay ang babaye antes nasapwan ang bangkay sini sang Martes, Oktubre 26.
”ANO ANG KAANGTANAN SANG KABULIG SANG BIKTIMA SA KRIMEN?”
Mas nagbaskog ang pagpati sang pamilya sang babaye nga bangkay na sang nasapwan sa Barangay Inangayan, Sta. Barbara, Iloilo, nga may ihibalo sa natabo nga krimen ang kabulig sang biktima.
Sa interview sang Bombo Radyo kay Barangay Kagawad Peter Vigo sang Bo. Obrero, Lapuz, Iloilo City, tiyo sang biktima, iya ginpahayag nga santo sa panaysayon sang iloy sang 36 anyos nga biktima nga si Claire Diergos, kumpirmado nga halin mismo sa balay sang babaye ang ginputos nga habol kag comforter sa bangkay sini.
Nagapati si Vigo nga mahipid nga ginplantsa ang krimen sa sulod sang balay sang iya hinablos sa diin matapos ginputos sa habol ang bangkay sini, ginsulod pa ini sa iya sports car kag gin-park sa maligwin nga lugar agud nga mabudlayan ang mga otoridad sa imbestigasyon.
Bangud sini suno sa opisyal, dako ang posibilidad nga may ihibalo sa krimen ang kabulig sang biktima nga si Rodelyn Sumbang bangud yara lang ini sa sulod sang balay ni Diergos humalin sang na-hire ini.
Nahibaluan nga gin-hire ni Diergos ang kabulig sang nagligad lang nga Dominggo, Oktubre 24.
Apang, una na ginpahayag ni Sumbang sa interview sang Bombo Radyo nga wala siya sang may matudlo nga posible may kahimuan sang krimen bangud bag-o lang gid niya nakilala ang biktima.
