ILOILO – Kaimulon ang nagtulod sa duha ka mga mataas nga lider sang New People’s Army nga magsungka sa Philippine Army.
Ini ang kasunod sang pagsungka nanday alyas Baby, 33, political guide kag medical officer sang squad 2 sang Suyak Platoon kag alyas Agila, 51, team leader sang Speical Partisan Unit sang Komiteng Rehiyon-Panay.
Sa interview sang Bombo Radyo kay Lt. Col. Joel Benedict Batara, commanding officer sang 61st Infantry Batallion sang Philippine Army, iya ginpahayag nga nagsungka ang duha bangud sa kaimulon sa pagpangabuhi sa bukid.
Ginpahayag man ni Batara nga magluwas sa kapigaduhon, luyag na sang duha ka mga rebelde nga magpangabuhi sang malinong kaupod ang ila pamilya.
Si alyas Agila ang 17 anyos pa lang sang nagpakigbahin sa New People’s Army samtang si alyas Baby ang naga-edad pa lang sang 15 anyos sang nag-intra sa rebelde nga grupo.
Kadungan sang pagsungka sang duha, ginhatagan man sila sang ayuda santo sa Enhancement of the Comprehensive Land Integration Program para sa mga rebelde nga nagbalik sa sabak sang gobyerno.
Samtang, suno naman kay alyas Agila, nahaylo gid siya sa propaganda sang rebelde nga grupo.
Wala siya naglaum suno kay alyas Agila nga gutom kag kabudlay ang iya maabutan sa pagpakigbahin sa New People’s Army.
Ang ila nga ginagamit nga armas-luthang suno kay alyas Agila ang gikan sa mga pulis nga ila gindis-armahan.
Nahibalu-an nga lakip sa mga ginsungka sang duha ka rebelde amo ang colt rifle, magazine kag 5 rounds sang live ammunitions ng 5.56MM, vintage rifle nga may 10 rounds ng 7.62 live ammunitions, US long springfield 30 caliber rifle, 18 rounds live ammunitions sang 30 caliber, 38 caliber pistol, 6 rounds sang live ammunitions, 3 rounds empty shell sang 40MM kag mga subversive documents.
