ILOILO CITY- Gin-identify na sang Philippine National Police ang duha pa ka at large nga mga suspek sa holdup incident nga natabo sa Barangay Agdahon, Passi City, Iloilo kun sa diin nataban sang mga suspek ang masobra P1.5 million gikan sa duha ka mga empleyado sang hardware store nga nahamtang sa Calinog, Iloilo.
Sa interview sang Bombo Radyo kay PCol Adrian Acollador, direktor sang Iloilo Police Provincial Office, iya ginpahayag nga ang duha pa ka mga ginapangita nga suspek amo sanday Antonio Alcarde,60 anyos kag Teodoro Chavez, ginabanta masobra 50 anyos ang edad.
Suno kay Acollador, si Alcarde ang ginatudlo nga lider sang grupo kag may pending ini nga kaso nga frustrated murder.
Matandaan nga una na nadakpan ang duha sa apat ka mga suspek nga sanday Carlos Alcarde, 44, kag Adrian Pineda, 25, lunsay pumuluyo sang banwa sang Calinog.
Nahibaluan nga sa masobra P1.5 million nga gintaban, yara na lang sa P247,000 ang na-recover sang mga pulis.
Gin-ako naman sang mga suspek nga gintunga nila nga apat ang kuwarta, ginbayad sa utang, kag gintaya sa sugal lakip na sa e-sabong.
Gindula naman sang IPPO Director ang posibilidad nga may political affiliation ukon may koneksyon sa pulitika ang serye sang kinawatay sa probinsya.
