Ginbulgar sang isa ka kongresista nga magluwas sa kontrobersyal nga “Mary Grace Piattos”, may mga kapareho pa sini nga apelyido nga nakabaton man sang confidential funds ni Vice President Sara Duterte.
Suno kay House Deputy Majority Leader kag Young Gun Rep. Paolo Ortega V sang La Union, natukiban sa bag-o nga mga dokumenbto sa impeachment complaint nga may duha pa ka pangalan nga amo ang “Pia Piatos -Lim” kag “Renan Piatos.”
Apang indi kaangay kay Mary Grace, ang ila apelyido nga “Piatos” ang may isa lamang ka letter T sa spelling.
Nagguwa man sa lista sang nakabaton sang confidential fund si “Xiaome Ocho” nga katunog naman sang cellphone model nga Xiaomi nga nahimo sadtong 2018.
Suno naman kay Ortega, tumalagsahon ang special treatment sa pamilya “Piattos” bangud tatlo gid sila ang qualified nga nakabaton sang confidential funds.
“Grabe naman ang ‘special treatment’ sa pamilya Piattos. May Mary Grace Piattos, may Pia Piatos-Lim, may Renan Piatos. Ano bang meron sa kanila at parang qualified silang lahat makatanggap ng confidential funds?” suno sa kongresista.
Kaangay kay Mary Grace Piattos kag kay “Kokoy Villamin” nga nakit-an sa confidential fund receipts sang Office of the Vice President (OVP), wala man ang mga ini sang record of birth, marriage kag death sa Philippine Statistics Office (PSA).
Ini nga mga pangalan amo ang gin-report ni Sara sa Commission on Audit (COA) sang ginbaton sini ang iya nga confidential funds.
Gin-insister ni Ortega nga dapat maghatag sang paathag si Sara kaangot sa sini nga mga personalidad nga ginhatagan niya sang pondo.
“Ang akala natin, isang pangalan lang ang katawa-tawa sa listahan ng confidential funds recipients. Pero mukhang may buong pamilya na ng ‘Piattos’ at pati isang cellphone model na nakasama,” suno pa sa solon.
Ginpasalig man sang Young Gun nga i-expose sini ang dugang nga mga miyembro sang iya gintawag nga “Budol Gang” nga nagatumod sa unique nga mga pangalan nga naka-mensyonar sa mga resibo ni Sara.
“This ‘Budol Gang’ is getting out of hand! First, we have the Piattos family, and now even a cellphone?” dugang sini.
Ini nga mga resibo ang naangot sa P125 million confidential funds ni Sara nga gingasto sa sulod lamang sang 11 ka adlaw sang 2022 santo sa nauna nga rebelasyon ni Marikina 2nd District Rep. Stella Quimbo.
Matandaan nga pila ka beses na nga gintinguhaan nga mahibal-an kun sin-o si “Mary Grace Piattos”, gindala man sa hearings sang quad comm, kag gin-anunsyo pa ang reward money sa sin-o man nga makatudlo kun sin-o ini, apang tubtub subong, ligom-dulom ang publiko kun sin-o ini nga persona.
Nahibaluan nga ang kwestyunable nga paggamit sang confidential fund ang nalakip sa Articles of Impeachment nga gin-file sang Kamara batok kay Sara sang Pebrero 5.
Gina-uyatan subong sang Senado ang bola bangud ang upper chamber ang magapungko nga impeachment court sa sini nga kaso.
