Nadakpan sang Bureau of Immigration (BI) officers sa Ninoy Aquino International Airport (NAIA) Terminal 3 ang duha ka mga babaye nga nagapakuno-kuno nga mga Pilipino kag tuyo nga magkadto sa China.
Suno kay BI Commissioner Norman Tansingco, ang duha ka mga pasahero nga gintago lang sa pangalan nga ‘Dianne’ kag ‘Myla’ ang nagtuyo nga magsakay sa Cathay Pacific flight pakadto sa Beijing apang napunggan sang immigration officers matapos gindudahan ang ila identity bangud pareho sila nga indi makahibalo maghambal sang Filipino language.
Sa press statement sang BI, ginsiling nga si Diane, 61, ang nagpresentar sang isa ka valid nga Philippine passport kag may yara pa sang birth certificate. Nakit-an sang officers nga 2002 lang ang iya birth registration sang nagaedad na ini sang 39-anyos.
Wala man nagasanto ang iya statements kaangot sa iya identity kag sang ulihi, gindeklarar sini nga indi na sini madumduman kun sa diin siya nga eskwelahan nag-enroll diri sa Pilipinas.
Ang pasahero naman nga si “Myla” ang nag-tuyo man nga makaguwa sa Pilipinas paagi sa separado nga immigration counter, apang natigayon man nga napunggan kag gin-refer man para sa assessment bangud wala man nagasalanto ang iya ginpangbuy-an nga statements.
Gin-presenter sini ang isa ka Philippine passport, may Philippine driver’s license, kag isa ka UMID ID.
Gin-claim man sini nga gin-homeschool siya sang iya lola kag indi naman makadumdom sang iya childhood kag iya pamilya. Sang ulihi, gin-ako sini nga nakuha lamang niya ang iya mga dokumento paagi sa tawo nga iya na-kontak online.
Ginsiling sang BI nga nagasuspetsa sila nga lunsay Chinese nationals ang duha ka mga pasahero kag posible nga bag-o na naman nga kaso sang fraud.
Nagapabilin ang duha sa pasilidad sang immigration sa Bicutan, Taguig, mangatubang sa immigration deportation charges, kag usisaon man kun may kaangtanan sila sa Philippine Offshore Gaming Operators.
