2 patay, 1 pilason sa Iloilo bangud sa hiligut-anon sa duta

ILOILO CITY – Patay ang mag-iloy samtang isa ang pilason sa stabbing incident sa Barangay Tiwi, Barotac Nuevo, Iloilo kagab-i.
Nakilala ang napatay nga mga biktima nga Nelly Britania, 80,anak sini nga si Lilibeth Silvederio, 52, samtang pilason naman si John Kenneth Silvederio, 13, nga karon kritikal ang kahimtangan sa ospital.
Sa interview sang Bombo Radyo Iloilo, ginpahayag ni C/Insp. Reymund Celoso, hepe sang Barotac Nuevo Police Station, kaina sang kaagahon sang mag-surrender ang suspek nga si Efren Descutido matapos nga nagpalagyo kagab-i.
Suno sa suspek, tuman ang iya kaakig sa pamilya sang mga biktima bangud sang away sa duta.
Ginpahayag sa Bombo Radyo sang testigo nga si Mark nga nabatian pa niya sang nagsinggitanay kagab-i ang biktima nga si Lilibeth matapos nga gintapas sang suspek ang tanom sang biktima nga kamote, antes ginlagas ni Descutido ang biktima.
Matapos nga ginbuyayaw ang suspek, ginsulod ni Descutido ang puluy-an sang biktima kag ginbuno ang mga ini.
Suno naman kay Punong Barangay Antonio Barsales, may nervous breakdown ang suspek.