Duha patay samtang duha man ang pilason sa bunggo-anay sang motorsiklo sa Barangay Jibolo, Janiuay, Iloilo.
Ang isa ka motorsiklo ang ginamaneho ni John Moreno, 33 anyos kag angkas sini ang iya asawa nga si Analyn Moreno , 33 anyos kag lunsay residente sang nasambit nga barangay.
Sa pihak naman nga motorsiklo ang ginamaneho ni Mark Joseph Ajeno, 20 anyos kag angkas sini ang iya amay nga si Josefino Ajeno, 50 anyos kag lunsay residente sang Barangay Cahaguichican, Pototan, Iloilo.
Sa interview sang Bombo Radyo kay Police Master Sergeant Eddie Roncal, imbestigador sang Janiuay Municipal Police Station, iya ginpahayag nga halin sa Barangay Poblacion, Janiuay sanday Moreno kag papauli na kuntani sa Barangay Jibolo samtang ang mag-amay nga Ajeno ang halin man sa Barangay Poblacion apang papauli na sa Pototan sa diin nagasumalangay ang duha ka mga motorsiklo.
Suno kay Roncal, nag-overtake si Ajeno sa tricycle sa atubang niya rason nga nakabunggo ini sa motorsiklo nga ginamaneho ni John Moreno.
Pilas sa ulo ang naangkon ni John Moreno nga nangin rason sang iya kamatayon samtang pilason naman ang iya nga asawa.
Sa pihak nga motorsiklo, pilas sa tiil kag kamot ang naangkon ni Mark Joseph Ajeno apang ang iya amay nga si Josefino ang gindeklara nga dead on arrival bangud sa patal nga pilas sa ulo.
Magluwas sa duha ka mga motorsiklo, ang nagasunod nga motor kanday Ajeno ang natumba man.
