Patay ang duha ka mga lalaki lakip na ang gintumod sang Criminal Investigation and Detection Group (CIDG) Region 6 nga mataas nga myembro sang Communist Party of the Philippines-New People’s Army (CPP-NPA) matapos ang natabo nga engkwentro kasunod sang pagserbe sang search warrant sa isa ka subdivision sa Barangay Balabag, Pavia, Iloilo.
Ang subject sang warrant of arrest amo si Reynaldo Bocala alyas Bading kag ginapahayag myembro sang communist terrorist group.
Samtang patay man ang isa niya nga kaupod sa sulod balay nga si Willie Arguilles ukon certain “Ramon” base sa ID nga narecover nga iya sang “Bayan Muna”
Sa interview sang Bombo Radyo kay PLt. Col. Gervacio Balmaceda, pinuno sang CIDG Region 6, iya ginpahayag nga si Bocala ang “most wanted person” sa Western Visayas.
Apat ka mga warrant of arrest ang ginserbe kay Bocala lakip na ang mga masunod;
- Robbery in Band with Frustrated Homicide and Damage to Property
- Robbery with Serious Physical Injuries
- Violation of Presidential Decree 1744 (Destructive Arson) kag;
- Murder
Suno kay Balmaceda, nagpakilala ang pulis sa subject apang ginapahayag nga nagpalupok si Arguilles sang armas.
Diri kag nagbalusay sang lupok ang duha ka mga lalaki kag ang katapo sang gobyerno.
Si Bocala man ang gintumod nga bana ni Maria Concepcion “Concha” Araneta , ginapahayag Deputy Secretary sang Komiteng Rehiyon- PANAY.
Wala naman sang may napilasan ukon napatay sa katapo sang gobyerno.
Dugang pa ni Balmaceda, narecover sa crime scene ang duha ka caliber .45 pistols, Subversive Documents, Empty shells kag mga cellphones.
